Serikali imeendelea kuimarisha mikakati ya kuondoa changamoto ya ajira kwa vijana nchini kupitia utekelezaji wa miradi mbalimbali inayolenga kuongeza ujuzi, uzoefu wa kazi na fursa za kujiajiri kwa wahitimu wa vyuo na vijana wenye taaluma tofauti.

Hatua hizo ni sehemu ya dhamira ya Serikali kuhakikisha vijana wanakuwa na uwezo wa kushiriki kikamilifu

Hayo yameelezwa leo Mei 22, 2026, Bungeni jijini Dodoma na Naibu Waziri wa Ofisi ya Waziri Mkuu Kazi, Ajira na Mahusiano, Mhe. Dkt. Evaline Munisi, wakati akijibu swali la Mbunge wa Viti Maalum, Mhe. Amina Ali Mzee, aliyetaka kujua hatua zinazochukuliwa na Serikali kupunguza tatizo la ajira kwa vijana wanaomaliza masomo.

Akijibu swali hilo, Dkt. Munisi amesema Serikali imeandaa na kuendelea kutekeleza Mwongozo wa Taifa wa Mafunzo ya Uzoefu Kazini wa mwaka 2017 unaolenga kuwapa vijana nafasi ya kujifunza kwa vitendo katika maeneo mbalimbali ya kazi kupitia ushirikiano kati ya sekta ya umma na sekta binafsi. Alisema mafunzo hayo yanasaidia vijana kupata uzoefu unaohitajika katika soko la ajira.

Aidha, amesema Serikali kupitia Programu ya Taifa ya Kukuza Ujuzi inayosimamiwa na Ofisi ya Waziri Mkuu Kazi, Ajira na Mahusiano imeendelea kuwawezesha vijana kwa kuwapatia mafunzo ya vitendo yanayowaandaa kuingia katika ajira rasmi au kujiajiri. Programu hiyo imekuwa msaada mkubwa kwa wahitimu wanaokosa uzoefu unaohitajika na waajiri wengi.

Dkt. Munisi alibainisha kuwa kupitia mafunzo hayo, jumla ya wahitimu 32,194 wamenufaika kwa kupata ujuzi, maadili ya kazi pamoja na uzoefu unaowawezesha kushindana katika soko la ajira. Alisema hatua hiyo imechangia kuongeza idadi ya vijana wanaopata ajira au kuanzisha shughuli zao binafsi za kiuchumi.

Sambamba na hilo, Serikali imeanzisha programu maalum za kuwawezesha vijana katika sekta zenye uwezo mkubwa wa kuzalisha ajira ikiwemo kilimo kupitia programu ya BBT, madini kupitia MBT pamoja na sekta ya uvuvi kupitia programu ya BBT-LIFE. Programu hizo zimekuwa zikitoa mafunzo na mitaji ya kuwawezesha vijana kushiriki katika shughuli za uzalishaji kwa tija.

Katika hatua nyingine, Serikali imeendelea kufungua fursa za ajira nje ya nchi kwa kuunganisha vijana wa Kitanzania na waajiri wa mataifa mbalimbali kupitia mikataba ya ushirikiano wa ajira. Dkt. Munisi amesema kuwa nchi zinazoshirikiana na Tanzania katika utoaji wa ajira ni pamoja na Qatar, Saudi Arabia, Falme za Kiarabu (UAE) na Iran ambapo vijana 7,593 wamenufaika katika kipindi cha Julai 2025 hadi Aprili 2026.

Aidha, Serikali imeendelea kutoa mikopo yenye masharti nafuu kwa vijana ili kuwawezesha kuanzisha au kuendeleza shughuli za kiuchumi. Dkt. Munisi amesema kuwa katika mwaka wa fedha 2024/25 jumla ya shilingi bilioni 36.64 zilitolewa kwa vikundi 2,827 vya vijana, huku mwaka 2025/26 Serikali ikitenga shilingi bilioni 200 kupitia Mfuko wa Maendeleo ya Vijana kwa ajili ya kuongeza fursa za ajira na kujiajiri nchini.