Serikali inaendelea kuthamini mchango wa sekta binafsi katika kukuza Uongozi bora, Ajira stahiki pamoja na kuimarisha usawa wa kijinsia mahali pa kazi.

Hayo yamebainishwa na Naibu Waziri, Ofisi ya Waziri Mkuu – Kazi, Ajira na Mahusiano, Mhe. Rahma Kisuo, wakati akifungua Kongamano la Women’s Leadership Forum Machi 28, 2026 jijini Dar es Salaam.

Mhe. Kisuo amesema mafanikio ya taifa yanategemea ushirikiano madhubuti kati ya Serikali na waajiri katika kujenga mazingira ya kazi yaliyo salama, jumuishi na yanayoheshimu haki za wafanyakazi wote bila ubaguzi.

Aidha, amempongeza Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kuendelea kuongoza juhudi za kuweka sera na mikakati inayowawezesha wanawake na vijana kushiriki kikamilifu katika uchumi wa taifa.

Awali akizungumza, Mwenyekiti wa Tanzania Leadership Foundation (TLF), Bw. Jabir Omar Makame, ameishukuru Serikali kwa kuendelea kuimarisha ushirikiano na sekta binafsi, akibainisha kuwa hatua hiyo inalenga kuwawezesha vijana na wanawake kuongeza uwezo wao wa kushiriki kikamilifu na kutoa mchango chanya katika maendeleo ya taifa.

Naye mmoja wa washiriki wa kongamano hilo, Bi. Grace Daniel, ameiomba Serikali kuendelea kuunga mkono juhudi hizo, akibainisha kuwa makongamano kama hayo yanawajengea wanawake na vijana kujiamini na kuwapa motisha mpya katika jamii.